Феруза ОРИПОВА
Давр. Қалб. Қиёфа
Дилга ором сухандон
Садоқатли телетомошабинларга яхши таниш бўлган Дилором Умарова Ўзбекистон телевидениеси тарихида ёрқин из қолдирган устоз сухандонлардан бири бўлди, десак муболаға қилмаган бўламиз. “Ойнаи жаҳон” орқали томошабинни экранга мафтун этиб қўйган, овозининг тиниқлиги, талаффузининг аниқлиги, кийинишидан тортиб, соч турмагига қадар эътиборингизни тортадиган латофатли аёл чин маънода зариф касбига муносиб ижодкорлардан саналади.
Фарғона вилоятининг Бағдод туманида 1957 йилнинг 28 августида зиёли оилада дунёга келган сухандон қизнинг ортидан омад бежиз эргашиб юрмаган. Тумандаги “Узсельхозтехника” автокорхонаси раҳбари бўлган отаси Қўчқорали Умаров, мактабда рус тили ва адабиёти фани ўқитувчиси бўлган онаси Ойнисахон Умаровалар оиладаги етти нафар фарзандларнинг орасида шу бийрон қизалоғини келажакда ҳеч кимникига ўхшамаган тақдир кутаётганлигини сезардилар. Боиси у адабиётни севар, шеър ўқишни ёқтирар, хушмуомала, ўзига оро бериши бошқача эди.
Мактабни аъло баҳолар билан тамомлаган Дилором Тошкент маданий-оқартув техникумининг режиссёрлик бўлимига ўқишга киради. Ўқув даргоҳида Ўзбекистон телевидениесининг режиссёри Саъдулла Анорқулов ва машҳур драматург Ҳайитмат Расулдан сценарий ёзиш ва режиссёрлик маҳоратидан сабоқ оларкан, улар сабаб телевидениенинг адабий-драматик кўрсатувлар таҳририяти томонидан тайёрланадиган “Шеърият бўстони” кўрсатувига жонли эфирда шеър ўқиш учун таклиф этилади.
Тўлиқ ҳолда «Саодат» журнапида ўқишингиз мумкин.
