“Саодат”нинг эллик йиллик тўйида
Хотиралар қизиқ нарса. Баъзан улар катта тўлқиндек қуйилиб келади-ю, бутун вужудингизни эгаллайди. Масофалар оша олиб ўтиб, умрнинг у ёки бу палласида кечган воқеаларни яна қайтадан кашф қилишга ундайди.
Зулфияхоним – йигирманчи асрнинг буюк шоири, давлат ва жамоат арбоби бўлишларига қарамай, ҳар қандай анжуманда онадек меҳрибон, самимий қиёфалари билан ҳайратга соларди. Улар Абдулла Қодирий “Ўткан кунлар”ида тасвирланган ўзбек, шарқ аёли характерининг давомидек туюларди. 1975 йилда “Саодат” журнали ўзининг эллик йиллик тантанасини нишонлаганда, собиқ иттифоқ республикаларидан нуфузли меҳмонлар келди. Самолётларнинг кўпи тунда қўнишини биламиз. Биз – таҳририят ходимлари меҳмонларни ўзимиз кутиб олиш учун аэропортга чиқар эдик. Зулфия опамлар эса, таркибда давлат арбоблари ҳам бўлган москвалик меҳмонларни шахсан кутиб олишга чиқдилар.
Биз уларни тунда безовта қилмайлик деб аясак, Зулфия опамларнинг кўзига уйқу келмас, бир неча марта телефон қилиб аҳволимизни сўрар эдилар. Ҳар сафар Муроджон ака билан сўзлашиб, “Албатта, хавотир бўлманг!” деган жавобни олиб, кейин ҳам бизга иззат билан муносабат билдириб, ҳатто уйдан чиқиш пайтимизда машина бегона эмаслигига ишонч ҳосил қилиш учун йўл бошигача кузатиб қўйишимни илтимос қилганларини ҳеч қачон унутмайман. Шундай муносабатдан кейин жамоадаги юртдошларимиз ҳам, жуфтларимиз ҳам ўзини қадрли ҳис қиларди. Юбилейдан сўнг таассуротлар ҳақида сўзлашганимизда, мен шу тунги ҳолатларни айтиб берганимда, Зулфия опамлар кулиб:
– Куёвларни пайғамбарлар ҳам сийлашган, дейишади-ку. Ўзинглар мени кўпинча “онамизсиз” дейсизлар. Узатган қизларимга иш буюриш учун аввал куёвлардан изн олишим керак-да! – деган эдилар.
Шу самимият, шу ҳурмат муҳити “Саодат”нинг эллик йиллик тантанасини ўзгача руҳ билан ёдимизда қолдирган.
Вақт ўтиб, яна эллик йиллик йўл босиб ўтилди. Бугун “Саодат” ўзининг юз йиллик тантанасини нишонлар экан, Зулфияхоним каби фидойи ижодкорларнинг меҳри ва хотиралари унинг саҳифаларида абадий яшаб келмоқда.
Раҳима ШОМАНСУРОВА,
Ўзбекистонда хизмат кўрсатган журналист.
